[Llangréu 3-0 Ciares] Buen Ciares, pero munchu Llangréu

El conxuntu teyeru dio la cara en dellos tramos del alcuentru, pero’l conxuntu llangreanu fizo valir la so mayor pegada ente la portería rival.

Marchó’l Ciares de vacíu de la visita al Ganzábal Nuevu, onde topó con un Llangréu llanzáu escontra’l primer puestu de la tabla. El conxuntu teyeru tuvo inclusu ocasiones que pudieron tener fecho variar el signu del partíu, pero nun acertó y acabó pagándolo.

Prefirió Eraña dexar fuera de la convocatoria por precaución a Aitor, con molesties por un golpe. Tamién dexó a César nel banquín dempués de ser titular ente’l Tinéu la xornada anterior. Munches novedaes con respectu al equipu que xugó ente’l Tinéu nel once bricker, que salió bien al partíu y que contrarrestó una primer ocasión llocal a los cinco minutos con una de les oportunidades de gol más clares de tol partíu pa los d’Eraña. Corría’l minutu diez, y Chus Naves quedaba solu ente Adrián Torre pero desperdiciaba la ocasión. El sustu despertó al Llangréu, que contó con dos opciones clares ente Davo que’l porteru teyeru resolvió con calidá. La primera, a los quince minutos a un disparu de Michu; la segunda, un llanzamientu directu de Berto Cayarga que Davo desvió con una estirada preciosa.

Nesos momentos el Llangréu yá se ficiera col dominiu del alcuentru y llegaba con claridá al área del Ciares. Así, nel minutu 33 llegó’l primer tantu azulgrana, obra de Luis Nuño, que remató perfectamente de cabeza un centru fantásticu de Michu dende la esquierda. Los últimos venti minutos de la primer metá convirtiéronse nun monólogu llangreanu, pero’l marcador yá nun diba movesese y los dos conxuntos tomaron el camín del vestuariu cola victoria momentanea del Llangréu por un gol a cero.

El Ciares errara les sos oportunidaes y tenía de reaccionar na segunda parte pa tener dalguna opción de remontada. Y tuvo una ocasión pa volver a cambiar el signu del partíu, con un remate de Ponte a centru de Pablo Martínez que nun atopó portería. Sicasí, el que nun falló a los cinco minutos de la reanudación foi Michu, que s’encargó d’acabar con cualquier dulda sobre una posible remontada teyera. L’atacante azulgrana recibió un gran pase en profundidá de Claudio pa quedar solu ente Davo y definir mui bien pa superar al porteru ciarista.

El partíu paecía yá rotu, y Claudio tuvo nes botes la sentencia definitiva con un disparu que dio nel poste. Pero contra tou pronósticu, despertó’l Ciares, que volvió a meter el mieu nel cuerpu al Llangréu en dos acciones consecutives nes que la suerte alióse colos llocales. En primer acción, Cris Alonso internó pela banda esquierda y el so disparu repeliólu’l palu. La xugada finalizó en falta peligrosa, que Pablo Martínez s’encargó de llanzar pa estrellar de nuevu’l balón nel poste. Tres d’eses ocasiones teyeres el dominiu del partíu foi alterno; y nengún de los dos equipos llogró imponese al otru nel xuegu. Al Llangréu, en tou casu, el resultáu favorable nun lu obligaba a meter una marcha más. Asina, cercanu yá’l final del alcuentru y con too decidío, llegó’l tercer gol azulgrana nun penalti llanzáu por Luis Nuño.

Nun foi’l día del Ciares, que disputó buenos minutos y s’amosó competitivu ente un conxunto poderosu como’l Llangréu. Los d’Eraña pasarán yá a pensar na próxima xornada, na que s’enfrenten al Atléticu de Llugones en La Cruz.