[Llugones 2-3 Ciares] Preste con plasmu

El Ciares gana al Llugones nun gran partíu sobreponiéndose a les baxes, pese a complicase al final de la primer parte.

Despacha buen partíu esta mañana’l Ciares en Llugones, creando numberoses ocasiones de gol, anque dos goles seguíos de los llocales a puntu tuvieron de complica-yos la victoria.

Les baxes en mediucampu yeren cubiertes por Aitor Cañedo y Pablo Martínez. Dos perfiles distintos, qu’algamaron facese col mandu del partíu demientres la primer parte. El Llugones llegaba con muncha necesidá de puntos, al atopase no fondero de la tabla clasificatoria.

Vióse bien llueu quien diba ser l’equipu dominador nel partíu. Aitor Cañedo metía un gran pase pa Marcos. Revolvíase bien el punta xixonés y disparaba, pero marchaba arriba.

El gol llegaba a los 24 minutos. Cris desbordaba pela banda izquierda, bicicleta, va a llínia de fondu, y Natan emburria a gol. Con cierta fortuna. De fechu, remataba cola pierna cola que nun pretendía rematar. El gol en semifallu lleváu al estremu.

Col marcador a favor llegaben los meyores momentos de los visitantes. Fonso Bellón elevábase y remataba perfeutamente un córner servíu por Pablo Martínez, pero colaba’l balón llambiendo’l poste derechu.

Pero al nun ser el fútbol una ciencia exacta, cuando más dominaba’l Ciares remontó’l Llugones. Primero tres d’un córner a favor de los de Tino, na contra plantábase Wilmer mui solu ente Nacho y batíalu cruciando’l balón. Dende la grada añorábase tener fecho falta al entamu de la xugada.

Actu seguíu, de nuevu Wilmer batía a Nacho. Esta vegada con una gran volea dende fuera del área que se colaba pela escuadra. Dos ocasiones, dos goles.

Al descansu, Beni dexaba’l puestu a Hugo. Aitor encargábase del perfil zurdu del centru de la zaga, faciendo pareya con Fonso. Hugo colocábase per delantre de la defensa.

Nada más arrancar Marcos amosó de qué diba la cosa. Gran disparu buscando la escuadra que salva’l porteru mandandola a córner. Nel llanzamientu d’esquina, tocaba Hugo y Marcos remachaba. Facíase daqué de xusticia nel marcador.

Estos segundos 45 fueron de los coloraos. Sólo un disparu ente palos rexistraba’l Llugones, estadístiques probed pa un equipu sumíu en problemes.

Tuvo una perclara Marcos. Recibe’l centru dende la banda derecha mui solo. Con muncha calma, controla’l balón, espera a que caiga, pregunta-y la hora al so marcador, y cuando paecía gol estrellábase nel defensa y diba fuera.

Turnu pa Cayarga, queda solu frente al porteru tres d’un pase de Marcos, pero la so definición despexábala col pie’l cancerberu.

Polémica ente’l públicu llocal cuando’l entrenador decidía retirar a Wilmer, xugador que llevaba tol peligru sobre la portería defendía por Nacho. Tamién entraba Javi sustituyendo a Natan.

A solo 3 minutos del final llegaba’l gol de la victoria. Marcos, que nun da balón por perdíu, llévala ente defensa y porteru. Escora muncho a la izquierda, pero controla seliquino y la emburria cola pierna derecha a la rede, llogrando así l’enésimu gol como ciarista.

Terminaba l’alcuentru con un 2 pa un conducíu por Cayarga pero mal resueltu. 3 puntos importantes y xustos. Agora, na metá de la tabla, los teyeros colóquense a la mesma distancia del play off que del descensu. Los partíos d’equí al final de la primer vuelta van decidir por qué oxetivu-yos toca lluchar esta temporada.

De momentu, toca un Siero en problemes. El domingu a les 12:30 clarificaránse coses.