[Pravianu 4-1 Ciares] Cazaos pol Pravianu

El Ciares nun foi a encadenar el tercer trunfu consecutivu y se vio superáu en Santa Catalina pola versión más efectiva del Pravianu.

Enfrentábense en Santa Catalina dos equipos con distintes dinámiques. Mientres el Pravianu llegaba al alcuentru sumíu en serios problemes, con sólo 5 puntos y una única victoria a favor, el Ciares recomponíase d’un mal entamu, y con 12 puntos conseguíos de los últimos 15 disputaos asomábase a la metá de la tabla.

Tino incluyía nel 11 a un Iván Suárez que comenzaba la temporada como llateral diestru ente la baxa de Fonso, pero últimamente los sos minutos llegaben como mediucentru. El preparador xixonés dexaba a Pablo Martínez fuera del once.

Sicasí, nun arrancaba bien el partíu pa los teyeros. Un error na salida de balón de Davo terminaba col mesmu protagonista cometiendo penalti sobre Morán. El xugador llocal Guille Méndez nun perdonaba y subía’l primeru al marcador.

N’adelantándose l’equipu llocal, llegaron meyores minutos de los de Tino. Sin embargu, esa meyora nun llogró concretase n’ocasiones. Yera l’equipu pravianu el que casi sentenciaba’l partíu, cuando cerca del descansu, aprovechábense d’otru error na defensa visitante na salida del balón pa llanzar un contraataque rápidu que terminaba con un disparu dende la frontal de Balsera que se colaba pela escuadra de la portería defendida por Davo.

Apenes comenzaba la segunda metá, llegaba’l terceru. Acción pela banda izquierda, mal disparu que refuga Davo, pero’l balón cae-y a Morán que bate al porteru teyeru.

Yeren los peores minutos d’un Ciares incapaz d’aguantar el balón y de llevar inquietú a un Pravianu al que la victoria vien-y como aniellu al deu.

Otra vez yera Morán protagonista, pero perdía la ocasión d’algamar el so particular doblete. Yera l’antesala del cuartu gol. Arrebatába-y Beni’l balón al mesmu Morán, pero de nuevu rechace pa l’equipu llocal y gol de Xabi Semedo.

Con 4-0 y l’equipu grogui, veía como amás Marcos Iglesias veía la segunda mariella y l’equipu quedaba con 10. Severu problema pa un equipu que nun tenía’l so día. Sin embargu, los de Tino supieron recomponese con un home menos y mantener el tipu los últimos 20 minutos.

Con un home menos aportaba’l gol, obra de Juan Carlos a la salida d’un córner. Amás, una gran combinación ente Pablo Martínez y Javi Gutiérrez, ambos xugadores de refrescu, a puntu tuvo de convertise nel segundu visitante, viendo como’l disparu cruzáu marchaba fuera per poco.

Mal partíu teyeru, que sin embargu yá piensa nel duelu del próximu sábadu frente al Tinéu, cola vista puesta nos 3 puntos en xuegu. El conxunto visitante va llegar a la Cruz con sólo 7 puntos, al borde de los puestos de descensu. Al igual que’l Pravianu, con problemes serios. Pa’l Ciares, una nueva oportunidá pa colocase na metá alta de la tabla. Y ente selmana, el 1 de payares, a Grau.