[Previa L.lenizu] Primer match ball

A la Temporada 2013/14 queden-y dos partidos per delantre, una temporada que yá ye histórica pal Unión Club Ciares, pero que puede llegar a selo más.

De 6 puntos que queden en xuegu, nel peor de los casos el Ciares va xugar les eliminatories pol ascensu sumando 4 d’ellos. Esto ye, victoria mas empate. Pero queden abiertes otres posibilidaes, por casu, cumpliríase tamién en casu de ganar el domingu y que’l Cuadonga nun lo consiga.

Enfrente vamos tener al equipu L.lenizu. Equipu históricu qu’a pesar de recuperar esta temporada la categoría, realizó mientres la campaña momentos de gran xuegu. Llástima d’un bache na segunda vuelta que los averó a los puestos baxos de la tabla cuando transitaba tranquilamente pela zona templada de la clasificación.

Nel partíu d’ida pudimos alvertir munches de les sos virtúes. Toque de balón, emburrie, combinación. El partíu punxérasenos bien de cara con 0-2, pero na segunda parte consiguieron echanos tras hasta empatar nel descuentu cuando cuntaben con un xugador más.

Xente bien nuevo, con muncha proyección nesti L.lenizu 2013/2014. Fichaxes de xente de filiales, qu’apurren frescura al equipu. Más conocíu ye, por casu, Pedro Luis. Veteranu xugador, con más de 10 temporaes nel equipu, que se fixo famosu por viaxar les fines de selmana pa poder xugar los partíos.

Ante la previsible fiesta que se va vivir nel campu, la Directiva Ciarista decidió convocar día del acompañante. Los socios van poder sacar entraes a 5 euros. Pa los socios del L.lenizu, el preciu ye de 8 euros, nun intentu por devolve-yos el gran tratu recibíu nel partíu d’ida.

El 4 de Mayu podría ser una fecha histórica nel curriculum ciarista. ¿Dende ónde la vas a vivir?