[Resumen Playoff] Aventures y desventures d’un modestu nel playoff

Namá 22 hores dempués del final del partíu en La Veigona, el bombu daba vueltes y empareyaba la bola del Ceares cola de la Águilas…

El Calendariu nun daba tregua. Namá 22 hores dempués del final del partíu en La Veigona, el bombu daba vueltes y empareyaba la bola del Ciares cola del Águilas. Tres los primeros momentos de decepción, pola distancia y el costu del viaxe, llegaba la hora de ponese a trabayar. En seis díes, el Ciares tenía que xugar en Murcia.
La primer idea yera ponese en contautu col Real Avilés. Los de la Villa del Adelantráu teníen que xugar contra’l Cartaxena nes mesmes feches que los teyeros. Bien distintos presupuestos, distintos conceutos. El Ciares viaxaba solu.

El vienres a les 24:00 marchaben dos autobuses dende la Cruz. Unu, con los xugadores, l’otru, con aficionaos. Casi 1000 kilómetros per delantre. Viaxe llargu, viaxe eternu. Una vegada en destín, les primeres decepciones nun tardaron en llegar, les piscines de dambos hoteles, el del equipu y el de l’afición taben cerraes. Piscines zarraes, mayu, y Comunidá Murciana son conceutos que difícilmente se pueden creer si van na mesma frase. Nun foi torga pa los xugadores, ellos queríen bañase y ficiéronlo. Non asina los aficionaos, que tuvieron que bañase en cerveza pa superar el calor.

Mientres los xugadores empezaben la so particular concentración en Lorca, los aficionaos empezaben el so periplu por Águiles. La Peña Bilbaina d’Águiles, un particular chigre nel mesmu puertu de la villa marinera. Escudos del Athletic, semeyes del Rei Juan Carlos, biblioteca inglesa, y rexentáu por un béticu. El conceutu de pluralidá alzáu al so máximu esponente.

Llegaba’l día del partíu, y los xugadores yá supieron que nun diben tar solos. Afición y equipu xuntábense y facíen piña a la entrada al campu de El Rubial. Gaita, cantaraes, abrazos. “Vamos, ¿eh?” repitíase costantemente.

Nunca xugara’l Ceares ante tanta hostilidá. Insultos, salivazos. Un equipu obligáu por presupuestu a xubir frente a unu premiáu pola so estupenda temporada. Pero los brickers nun se diben achicar. Frente a la hostilidá, el Ciares viénose enriba. Primero Óscar Ruiz marcó’l so territoriu, y dempués fízolo l’afición ante les presiones de Ginés Meca al asistente. Somos modestos, pero queremos a esti Club y defendémoslu con brenga.

La Águilas nun paecía tan peligrosu a midida que diben pasando los minutos, y el Ciares veníase enriba adulces. El xugador más decisivu de los teyeros nesti play-off, Pablo Martínez, marcaba cuando se diba a cumplir el 90 y llevaba el deliriu a la zona visitante. El Ciares volvía con un empate a unu y convertíase en favoritu.

Llocura na selmana previa al partíu de vuelta. La vienta antemanada disparábase. La Cruz podía quedase pequeña, l’equipu atropaba portaes, conversaciones. El Ciares, per unos díes, sintióse l’equipu de moda. Finalmente 1500 persones arroparíen al equipu.

El partíu empezó ganándose. L’equipu camudó la orientación de la semeya pa posar frente a la pancarta “Gracies por facenos suañar”. Equipu motiváu, afición motivada. Ruxía la Cruz. Na primer parte de nuevu Pablo Martínez marcaba, con muncha clase, embaxo, col interior, un pase a la rede. El gol yera tan festexáu que parte del beneficiu del play-off tendrá de destinase a los desperfectos causaos pola celebración. El Ciares pasaba ronda, el Ceares facía hestoria.

De nuevu namá 24 hores pa baxar los niveles d’adrenalina. De nuevu llunes, de nuevu sortéu. El rival yera’l Trival Valderas. En sabiendo que yera un equipu madrilanu, empezaben de nuevu los preparativos. Los primeros estudios del equipu de Alcorcón asustaben. 83 puntos en lliga nel so grupu, esto ye, un equipazo. Los vídeos del equipu madrilanu dexábenlo claro, yera unu de los rivales más duros que podíen tocanos.

Magar que el ritmu de vienta d’entraes yera más baxu que la selmana anterior, la Cruz presentaba entá meyor entrada. Naide quería perdese al modestu equipu xixonés nos sos particulares díes de gloria. El campu teyeru atarraquitau, engalanáu. “Güei xuega’l Ceares”.

El Trival resultó ser un vendaval, dexando un contundente 0-3 pa la vuelta. Aun así, nin un solu pero. L’equipu diolo tou. Dos goles pa la hestoria de La Cruz dexaron na retina los madrilanos, dos de los meyores goles qu’enxamás se vieron en Los Periconos. Pero’l partíu nun acabó nel minutu 90, más bien empezaba. Aficiones y xugadores de dambos equipos xuníense nuna piña, toa una fiesta sobre’l verde y na grada. Dos equipos xuníos a pesar d’habese engarráu nel campu.

La resultancia non yá nun minó les ganes de l’afición teyera d’allegar a Madrid, más bien amplioles. L’equipu tenía que sentise arropáu y dir a tar. Unos 300 aficionaos xuntábense en La Canaleja. Xente que salió’l sábadu a esfrutar de la fiesta nel Chigre La Fuelga, sede de la peña ciarista en Madrid, y xente qu’arrincaba mientres la madrugada del domingu. 300 persones suañaben col 1-4, col 0-3, col 2-5. El suañu permanecía.

Tou un arranque de puxu, a pesar d’adelantrase’l Trival, la segunda parte del Ceares foi tou un exemplu de fútbol. Entrega y llucha. Remontábase’l resultáu. Minutu 72, el Trival quedaba con 10 y penalti a favor del Ciares. Con 1-3 funcionaben les calculadores, un gol más metíanos. Pero non tou ye matemáticu nel fútbol. Borja Noval, que nun fallara penalti anguaño, esnidiaba y el balón díbase-y. Heroicu’l final, con Lozano volviendo coxu al campu, los xugadores con calambres. L’equipu defendiera l’escudu con honor. L’afición sentíase más arguyosa que nunca.

Acabóse la temporada d’esti gran Ciares. Fíxose hestoria. Y yá tamos preparando la siguiente, que promete grandes emociones. De mano, Copa Federación. Llueu volvemos.