[Roces 0-2 Ciares] Un Ciares dominante
L’equipu teyeru domina los 90 minutos del so segundu derbi de la temporada y consigue una xusta victoria ante’l TSK Roces.
[youtube]https://www.youtube.com/watch?v=JYCqWelMvfQ[/youtube]
Roces 0 – 2 Ceares
Roces: Acevedo; Paramio (Jordan 80′), Molleda, Teto, Matheus, Borjita (Vigil 58′), San Eloy, Barquero, Sandoval (Javi Menéndez 76′), Adro y Chema
Ceares: Davo, Hevia, Fonso, Aitor, Chery, Hugo (Beni 64′), Raúl, César, Cris (Pablo Martínez 69′), Marcos Iglesias (Natan 78′) y Ponte
Goles:
0-1: Marcos Iglesias 11′
0-2: Ponte 50′
Árbitru: González Suárez (Avilés). Amonestó pol TSK.Roces a Paramio, Adro, Teto y Molleda y pol Ceares a Marcos Iglesias, Raúl y Cris
Incidencies: Alcuentru correspondiente a la segunda xornada de la Tercerca División d’Asturies disputáu nel campu de Covadonga ante 300 espectadores. Terrén de xuegu artificial.
Repitía destín el Ceares nel primer desplazamientu de la Temporada. El pasáu cursu, na xornada 1 visitaben el Campu de Covadonga. Na actual, sería la segunda xornada. En dambos casos, llevába la victoria de vuelta al barriu.
Cutía primero’l TSK Roces. Ante’l plasmu de propios y estraños, programaba l’alcuentru al empar qu’el del Sporting. Ensin dulda eso podría restar aficionaos al derbi, pero eso nun paeció importar a los llocales. L’afición ciarista respondió, y nun faltó a la cita.
Nel terrén de xuegu, la superioridá ciarista foi aplastante. Durante los 90 minutos de xuegu, los llocales tuvieron a mercé de los de Miguelín, que llevaron les riendes del alcuentru y manexaron los tiempos a la perfección.
L’entrenador teyeru dibuxó un 4-4-2, cola última incorporación, Hugo Álvarez, de cortafueos, con César distribuyendo per delantre. En bandes, dos cuchiellos, Cris y Raúl, y enriba munchu poderíu, con Marcos Iglesias y Ponte.
L’empiezu del alcuentru yá foi clarificador. Cris Alonso engabitaba un remate que salvaba Acevedo como buenamente pudo. Empezaben les hostilidáes.
Namás 3 minutos dempués, Marcos Iglesias soltaba un llatigazu al balón na frontal del área que se colaba al palu curtiu. 0-1 a los 11 minutos, y la sensación de qu’esi partíu nun s’escapaba.
El Ceares trató de dexar el balón a la Roces, pero nin por eses los del barriu vecín yeren capaces de llegar a esmolecer a Davo, que dispunxo d’una llocalidá de luxu p’asistir al derbi.
Munchu centrocampismu y munches imprecisiones. Al descansu llegábase cola sensación de que’ Roces nun podía, y que’l Ceares tenía que matar el partíu lo antes posible.
Y nun tardó en facelo. A los 5 minutos de la segunda parte, gran pase de Marcos pa Ponte, y definición de súper luxu del ariete xixonés. Percima del porteru, con una d’eses vaselines que se sabe que van xubir al marcador, pero que’l balón tarda una eternidá en baxar. Un toque dulce, que mataba’l partíu.
Entraba Beni pa encontiar la defensa, y de camín pa poner n’apiertos al porteru llocal, nun gran remate de cabeza.
Remanando los tiempos el Ceares, col partíu decantáu, xugaben a placer. Los minutos pasaben y el TSK nun llegaba arriba. Inclusive les más clares fueron visitantes, con una xugada “marca Chery”, escapando de toos, pero’l so disparu cola so pierna mala salvábalu milagrosamente Acevedo, y con otra de Ponte, que se revolvía perbién nel área.
A la fin resultáu xustu, y vuelta al barriu colos 3 puntos baxu’l brazu. Dende Roces vense Los Pericones, ellí van los puntos. El sábadu nuevu rival de categoría, l’Uviéu B Equipu qu’arrincaba un puntu de la Cruz sobre la campana nel pasáu cursu. Vien de xugar play-off y calidá nun-y falta. Al Ceares tampocu.