Ciares – Ḷḷuarca: broche d’oru a la primer vuelta
El domingu a les 12:30 cerramos la primer vuelta. Escepcional papel el desenvueltu polos xugadores de la Teyerona, que nel peor de los casos acabaríen en 36 puntos, y colos posibles 39 nel puntu de mira, consiguiendo superar en namás 19 partíos la puntuación consiguida fai 2 temporaes.
Enfrente vamos tener a un Ḷḷuarca Club de Fútbol llueñe de los númberos de la pasada campaña. Magar la crisis económica la pasada temporada, cumplieron oxetivos y coláronse en Copa Federación con 54 puntos. D’aquel equipu, magar que caltiénense 9 xugadores, despidiéronse munchos d’ellos con gran pesu na Tercer División, como son Nacho García, qu’anguaño rexenta una cafetería n’Avilés, “el nuesu” Pichón, Pepe Saavedra y Pablo Díaz, nel Llangréu lo que ye güei, Vilches, porteru titular del Tiuya, Arroyabe, etcétera.
Pa suplir a estos optóse por xugadores con menos cartelu, como Miranda, Pelayo o Iván, remocicando asina al equipu. Tamién hubo relevu nel banquín. Pablo Lago y Pablín Braña dexaron l’equipu tres dos fantástiques temporaes, poniendo aldu al Llangréu, actual líder de la categoría. Agora ye otru Pablo’l que dirixe l’equipu, Pablo Villar, el que va buscar la salvación del equipu nestes 20 xornaes que queden per delantre.
Magar ocupar la penúltima posición de la tabla, naide en Ciares fíase del equipu que va visitar la Cruz el domingu, que vien amás de ganar a l’Urraca la selmana pasada, poniendo tierra pel mediu col actual postreru, el Tapia.
El Ceares tamién precisa la victoria, tres 3 xornaes ensin probar los mieles del trunfu. Un equipu que podría finar la primer vuelta ensin conocer la derrota nel so propiu feudu, y qu’amás, a pesar de tar asitiáu quintu, puede proclamase campeón d’iviernu batiendo un nuevu récord.
El domingu a mediudía ciérrase’l fútbol na Cruz mientres 2013. Un añu que resultó escepcional no deportivo y no social. Gracies a tolos que formáis parte del Ceares.