Torna La Cruz, torna la épica

Primer partíu en casa y primer victoria de la temporada. El verde recién cortáu, una tarde soleyera y los aficionaos atropaos nes graes; la tarde apuntaba perbién, el fútbol de tola vida volvía a La Cruz dempués del parón veraniegu, y notábase qu’había munches ganes d’ello.

Desque l’árbitru pitó l’empiezu del partíu la grada ciarista apertó tratando de meter el primer gol, pero l’empiezu nun pudo ser peor: nel minutu 5 el delanteru oviedista Iván Fernández escapábase en velocidá en dirección a Kike, y Rigo tirábalu siendo l’últimu defensa. L’árbitru nun lo duldó y amosó la cartulina colorada’l central, dexándonos con un futbolista menos. Por si fora poco, minutos dempués, nel 11, el filial aprovechaba l’amoriadura pola espulsión pa trenzar una bona xugada qu’Héctor terminaba definiendo penriba dende dientro de la área. N’apenes 10 minutos yá perdíamos 0-1 y teníamos un xugador menos. Sicasí, el nuesu campu nun ye cualquier campu, “esto ye La Cruz”, y como tantes vegaes vimos, equí tou ye posible. El xugadores sacaron tola so garra aguiyonaos pola afición, empezaron defendiendo metro a metro’l so campu, pa finalmente pasar al ataque y dar la vuelta al dominiu azul. Asina, nuna falta llateral, Juan Carlos remataba’l balón a la rede, pero l’árbitru anulo’l gol por un aldericáu fora de xuegu. Pocos minutos dempués, yá nel 45, repitíase la escena: falta zarrada botada por Borja Argüelles que Lozano remataba de cabeza pa poner les tables nel marcador y la llocura na grada. Empate a un gol y descansu.

Na segunda parte’l guión foi similar. L’Uviéu ‘B’ intentábalo, daba sensación de que daqué podía pasar, pero finalmente nun consiguía traducilo n’ocasiones peligroses. Los nuesos siguíen cola so seriedá, tratando d’afondar peles bandes con unos Pelayo Torre y Borja Argüelles bien participativos. Nel minutu 55 Nacho Cabo daba entrada a Meana por Rubo, de manera que reforzaba la exa del centru del campu y Jimmy quedaba como referencia en punta. Poco dempués, nel 61, entraba Aitor Cañedo por Óscar Ruiz nel llateral esquierdu. Y yá nel 66, nun córner sacáu dende la banda derecha, Iván Fernández volvía ser protagonista, esta vegada pa desgracia del so equipu, yá que tocaba’l balón cola mano dientro de la área y l’árbitru señalaba’l puntu de penalti. Juan Carlos asitiaba’l balón y llanzaba con muncha clase engañando al porteru. 2-1, les tardes d’épica volvíen a La Cruz. Pocos minutos dempués l’árbitru amosaba la segunda mariella al oviedista Adrián Llano por una dura entrada, igualándose les fuerces sobre’l verde. D’ende a la fin el filial carbayón intentó ensin ésitu por cuenta de la seguridá defensiva y la esperiencia local. Nel 83 saltaba al campu Pablo Martínez por Borja Argüelles. Muncha tensión hasta’l final, pero’l 2-1 nun se movería. Primeros trés puntos y fiesta ente los aficionaos ciaristas que ven como La Cruz inaugura la temporada con una d’eses tardes de maxa y épica que solo se viven nel nuesu campu.

Próximo partido Domingo a las 12:30 en La Cruz: U.C. Ceares – U.P. Langreo.