Una cantera épica: resumen y horarios del fútbol base

Tres una fin de selmana tan llarga como atípicu, debíu al gruesu de los partíos del club xugándose de vienres y dexándonos ensin l’habitual artículu previu a la fin de selmana, vamos repasar lo que socedió nos dos últimes xornaes nos campos del fútbol base.

 

Filial

Cánicas A.C. 3 – 1 U.C. Ceares B

Nun pudo sacar nada’l filial nel Nuevu Santa Cruz, un campu bien complicáu nel que los locales tán acostumaos a aprovechase de cada mínimu erru defensivu.

U.C. Ceares B 0 – 2 S.D. Atlético Camocha

Nuevu tropiezu y salida de los puestos de privilexu pal nuesu filial, que nuevamente vió como la falta de contundencia atras inclinaba’l partíu del llau visitante, nuna tarde con poco ambiente nes graes.

 

Xuveniles

U.C. Ceares 0 – 0 Codema

L’enfrentamientu col lider respondió a les mires y los rapazos de Manolo atoparonse ante un partíu tremendamente apostáu, contra’l meyor rival que van atopase anguaño, y onde la destacada actuación del porteru local Marcel torgó que los escolinos colaren colos trés puntos.

C.D. Manuel Rubio B 2 – 3 U.C. Ceares

Un drebi épicu. Tres una primer parte con dominiu alternu, colos locales sacando provechu de la so gran efectividá y de dalgún erru defensivu, llegose al descansu con un dos a cero nel marcador que paecía decantar el derbi del llau de los del Campu Municipal Los Pericones.

Sicasí’l ciares xuvenil caltuvo la fé, salió metíu nel partíu na segunda parte y golpe a golpe fué minando la moral y la ventaya del Manuel Rubio B, pa deliriu de los hinches que s’averaron al Campu Municipal Los Pericones tres el partíu del primer equipu en La Cruz, y que nun dexaron d’animar mientres tola segunda parte.

Una victoria que significa muncho más que los trés puntos por ser el derbi de Ciares y pola amuesa d’arguyu y caracter del equipu, que sal bien reforzáu d’esti choque.

Alevines

U.C. Ceares 1 – 6 C.D. Montevil

A pesar del claru ameyoramientu que van amosando partíu tres partíu, los nuesos esquiles siguen espereciendo cuando s’atopen con equipos más fuertes físicamente, casu del C.D. Montevil, qu’apoderó ensin problemes l’alcuentru y llevóse la victoria.

Arenal D 7 – 2 U.C. Ceares

Empezaron adelantrándose nel marcador los ciaristas, y casi el final de la primera parte’l partíu taba bien reñíu, pero la mala suerte colos rebotes en defensa y delles indecisiones crearon una fienda nel marcador que sacó al U.C. Ceares del partíu. Sicasí, compitióse a bon nivel mientres gran parte del partíu y la meyora dende principiu de temporada rescampla.

 

Benxamines

U.C. Ceares 3 – 8 E.F. Mareo

Primer derrota de la temporada na que los roxiblancos fueron cimeros mientres prácticamente tol partíu, mereciendo la victoria.

Llano 2000 C 2 – 5 U.C. Ceares B

Continua’l periplu escontra la parte alta de la tabla del nuesu benxamín B, esta vegada a cuenta de un Llano 2000 B que nun punxo les coses nada fáciles.

U.C. Ceares C 0 – 11 E.F. Viesques

Marcador demasiáu abuitáu pa los méritos de los nuesos, anque’l líder del grupu demostró’l porqué de la so posición y non dió opciones.

 

Prebenjamines

C.D. Roces 7 – 2 U.C. Ceares

Día marcáu pola mancadura de Noel cuando l’U.C. Ceares, cuartu clasificáu, apoderaba nel marcador por cero a unu escontra’l Roces, primeru. A partir d’esti momentu y con un xugador de campu defendiendo la portería pocu más pudo faese, y los goles fueron cayendo nel marcador.

U.C. Ceares B 4 – 1 San Julián

Ta dexando de ser novedá, el prebenxamín cada vez ye más competitivu y los meses que lleva rodando’l balón en competición van notándose. Bon partíu y segunda victoria de la temporada.

 

La d’esta selmana va ser la última xornada del 2013 pa los equipos de fútbol sala, despidiendo l’añu’l benxamím A contra’l líder, el Veriña C.F.

Horarios:

[eventlist start=”2013-12-13″ end=”2013-12-16″ limit=10]