[Xornada 29ª] Crónica en collorau y azul

La xornada nun paez que vaya a pasar a la hestoria pola so transcendencia. Nun depara cambeos nin penriba nin pembaxo, y yá llantamos na xornada 30 con tolos equipos na mesma posición.

Pravianu, Llangréu, Ciares y Llealtá siguen en posición de privilexu. Los 4 resolvieron los sos alcuentros ante L´Entregu, Andés, Avilés B y Uviéu, respectivamente.

Tres un nuevu empate, el Condal caye de la terna de candidatos. Con namás dos puntos de los postreros 15, los de Noreña cayen a metá de la tabla y quédense casi ensin opciones d’entrar en play-off. El Cuideiru sigue ensin parar, y suma la so octava xornada consecutiva ganando. Anguaño asítiase a 3 puntos del play-off, pero pindios del partíu aplazáu ente los maliayos y l’Atléticu de Llugones.

El Cuadonga pela so parte suma’l so 21ª xornada ensin perder, pero nun lu sirve pa restar puntos colos de riba. A manera d’interés, yá son 5 xornaes en que’l club uvieín y el Ceares alloñense en 6 puntos, siendo incapaces unos d’abrir buecu, y otros de retayalu. Esta xornada vencieron a un Candás que-yos metió’l mieu nel cuerpu al adelantrase na primer metá, pero finalmente cayíen por 3 tantos a 2.

Pembaxo, el partíu más importante yera’l qu’enfrentaba al L.luarca col Xixón Industrial. L’empate final sabe meyor a los fabriles. Sicasí, dambos equipos tán metíos nuna importante guerra, xuntu con Candás y L.lenizu. D’esos 4 va salir el tercer baxáu, y con un güeyu mirando al Caudal yá que podríen ser 2 los baxaos.

Andés y Tapia tiénenlo francamente complicáo. Queremos alcordanos sobremanera del Tapia, que lo tán pasando mal por cuenta de les envernaes reciéntes y los sos problemes col campu. Dende Ceares mandámos-yos tou nuesu sofitu.